Mansons Lot (已搬遷) 新店位置

星期日一早约好咗朋友仔嚟汕头街揾食，本身唔系嚟呢间，可惜冇开舖，误打误撞帮衬。虽然近排少咗好多人出街食饭，但系呢间餐厅舖头细细都有8成满，相信有一半系熟客。虽然坐位距离比较近，但感觉都舒服。餐牌款式都唔少，是日我㨂咗个牛肉阔面，朋友就选择咗鱼柳意大利饭。牛肉阔面睇落好似细细件，相信系片装芝士喺个阔面面，啱啱好覆盖晒个阔面，牛肉碎份量都唔少，味道平均，伴碟有沙律菜配上黑醋，食落份量对女士嚟讲就真系好足够。鱼柳意大利饭，份量十足，鱼柳件大大件，厚得嚟嫩滑，饭嘅口感软硬度适中。加杯Long Black，咖啡味香，浓淡度啱啱好，冇酸味，一杯真系唔够喉。当日我俩倾到唔知时间，只知客如轮转，亦有满坐嘅时候。虽然我哋两个原来都倾咗大概都有2个钟，不过服务员们都有为我哋添水，感觉良好。