The Point Kitchen (奧海城二期) (已結業)

疫情下，好耐冇约老友逛街，见疫情减退，终于可以放心约朋友去行吓街，食吓嘢。由于唔想去人流太旺嘅商场，所以今日同朋友去咗奥海城逛街。行到攰攰哋，见有间餐厅面积颇大，座位宽敞舒适，午餐价钱几抵，就入去试下。我哋叫咗两个午餐，之后发现有我最钟意嘅白酒煮蚬，所以忍唔住加多一个白酒炒大蚬。香蒜辣椒白酒炒大蚬 ～ 果然冇令我失望，白蚬大大只，无砂，肉好厚，加上好香嘅蒜片同阵阵嘅白酒味，辣辣地，好开胃，配埋迷迭香多士点汁食，一绝。跟住午餐到，今日餐汤系南瓜汤，非常creamy，好有南瓜味。面豉酱烤三文鱼 ～ 卖相唔错，配有牛油果薯仔沙律，比较特别，青露笋好鲜嫩，冇渣。三文鱼加上面豉酱烤，外脆内嫩，鱼肉嫩滑，好juicy，带少少面豉酱香味，有啲日本菜feel。烧烤酱猪肋骨 ～ 配柠檬乳酪椰菜沙律及薯条， 猪肋骨 size 都好大，配上特制沙律菜食，比较清爽，冇咁油腻。食完lunch，叹番杯 cappuccino，悠悠闲闲同朋友倾下偈，好relax。呢间餐厅虽然系我第一次嚟，但畀我嘅印象好好，环境好舒适，食物质素唔错，下次有机会会再来试其他食物。