僕之拉麺 (已搬遷) 新店位置

原本谂起去𠮶间一向坐落呢个位嘅拉面铺食个面。我想去之前确定唔会去到人哋落紧场，所以想喺open rice揾吓佢个lunch break系几点。因为唔记得个名，喺open rice揾深水埗日本菜。但揾唔到。已经觉得怪。但我照去，因为越谂越揾越想食。亦因为咁，所以写呢篇文。一去到，见到同一铺位，装修冇变，音乐冇变，食具冇变。但铺名同埋啲拉面相唔同咗，先知道已经转咗手。咁我当然照叫个拉面食。我拣咗浓汤拉面，加细露笋，加黑芝麻油，加炙叉烧，加味蛋。拉面到，望落几好。食完之后最强烈嘅感觉系，「可唔可以唔好用个铺位呃啲人嚟帮衬你呀？」汤：一饮落去，即刻饮到除咗猪骨汤味，仲有水喉水味，即系喺屋企冇过滤冇煲过嘅水𠮶种怪味。口感上，汤底唔够浓，佢嘅黏度只系来自后加嘅油脂，而唔系浓到好似啲骨髓溶哂嘅感觉。好似啲猪骨汤本身冇用足够嘅猪骨或者用啲冇咁有骨髓嘅骨或者煲唔够时间咁 😒面：好重碱水味，有少少煮耐咗，唔够弹牙。细露笋：写得细(佢哋个名唔系用呢个字，但我唔记得佢用乜)，就预咗好幼。但我估唔到个尾位会有渣。我逐条食，6-7条之中只有一条冇渣。黑芝麻油：我食唔到亦闻唔到。如果唔系黑色，我会以为啲油脂溶咗啲。