篤篤船麵 (荃灣千色匯) (已結業)

放工喺荃湾行咗阵千色店，买晒过年嘅用品啦，但系千色店𠮶头冇咩食，拎住咁重野，于是我地去左千色汇，睇吓有咩好味啦，快食完就走。喺2楼天仁茗茶𠮶层，有几间新食店，我见都几多人食。本身我地都想食牛摩，但因为太多人，所以唔想排队既我地，去左食隔间船面。依间餐厅一入黎，店员就会讲「沙娃d cup」，装修又好泰式，好colorful。睇下Menu，佢有大碗船面餐，又有细碗船面餐，可以食下唔同配搭，每样都浅尝一番，一于每个都叫黎试下。另外，都叫左啲小食同野饮。大碗船面：猪魔王（腩肉、猪肉片、扎肉）配猪汤金边粉材料丰富，猪汤好浓，饮落鲜甜，但唔会好甜，配金边粉好吸味。腩肉同猪肉片几爽口，食落有少少菇味，几特别。五碗细船面：一碗大约两三啖左右，但可以试唔同味道既面。佢既全蛋面配辣汤都几好食。另外，彩虹汤系南乳汤，酸酸甜甜几惹味。小食：席虾爽口弹牙，不过个席无咩味。泰式杂菜系卤水通菜，正正常常，如果配马拉盏会好啲。香茅猪扒，比较干身。饮品系青柠梳打：自动配上冰底，青柠似系腌过，整体饮品上不过甜。新铺岩岩开，佢服务态度好，安排都得当，新铺黎讲算唔错。面食质素不错，如果小食系新张过后，更上一层楼会更好！