十二味不只是烤魚 (已結業)

前排同朋友返大陆食烤鱼 真系食过翻寻味！但唔想下下都返大陆咁山长水远😭！醒起几个月前有个四川朋友带我地去食过酸菜鱼，而𠮶间舖系有烤鱼食的！！汲取上次食麻辣酸菜鱼越食越辣、辣到喷火嘅经验，我地今次决定食金牌蒜香，拣咗我最钟意食嘅鲩鱼！配菜拣咗加拿大肥牛同宽粉！呢间烤鱼嘅配菜有大豆芽、香葱、原粒大蒜同劲量香蒜，仲好特别地加上莴笋，唔似一般地方咁加青瓜，其实我真系麻麻地青瓜阵草青味，莴笋同样地有爽脆口感，我直头觉得呢点系所有烤鱼店都要效仿呀😂😂😂讲返条鱼，店舖标明每条三公斤重，真系无花无假！以两个咁钟意食鱼嘅人嚟讲都食到肚皮撑起！香脆嘅鲩鱼皮系我为呢条鱼加分嘅最大因素🤤其次就系鲩鱼虽然骨比较多，但其实肉量亦好多！近骨位置肉质尤为鲜嫩，食咗10几分钟我已经要麻烦店员帮我再换骨碟😂😂差啲肥牛同宽粉都食唔落，就知佢份量系几咁大！总括嚟讲，我已经认定咗佢就系红磡区数一数二地道同色香味俱全嘅烤鱼了😚题外话，虽然铺头系写十二味不只是烤鱼，但张单又会出十二味烤鱼九宫格！有点奇怪~~~