鮮芋仙 (已結業)

鲜芋仙系我至爱嘅芋圆专门店之一，去到日本都要食佢，反而喺香港开左，今次先系第二次食，之前每次想食，都系因为见到门口人龙而却步。今日做完嘢已经过左午饭时间，天气又翳焗，等左一阵车已觉汗系咁流，突然谂起附近就有间鲜芋仙，呢个时间又唔系糖水黄金时间，应该唔多人，去到见到真系无人，劲开心，一于芋圆当饭食，加埋碎冰帮身体降温。🍧招牌仙草冰沙 $45第一啖摆入口，透心凉嘅感觉，立即舒服晒，夏天食呢个，简直仙丹一样。仙草冰沙夹杂著仙草嘅香甜，配埋花奶一齐食又香又滑。👍基本上芋圆唔洗点介绍，呢度嘅芋圆口感真系无得输，有蕃薯/芋头香之余，口感特别烟韧，唔会有咬到粉团嘅感觉，Q弹有嚼劲。店舖光洁简约，店员又有礼貌，只要避开糖水时间，其实真系可以好舒服咁叹呢碗甜品，细食嘅女士食晒一碗都真系有饱肚嘅感觉，当正餐咁食，美味、消暑、仲可以避开人潮。