滾喜火鍋專門店 (已結業)

我系芝士狂迷，一向喜欢食芝士，今次系为咗一个芝士鸡煲帮衬呢间新开嘅火锅专门店，食完果然冇令我失望，佢暂时系众多芝士鸡煲中我最like嘅一间。老友推介我，话我知开咗一间新店，芝士鸡煲好正，我即刻约咗朋友试下。芝士鸡煲一上枱，未煮已经闻到香浓嘅芝士味，几款芝士混合在一起，颜色不同，睇见都吸引。根据佢嘅颜色,应该有cheddar cheese n mozzarella cheese 。煲热左个芝士鸡㖞嘅时候，芝士溶晒，我哋将鸡同芝士再搞下搞下，闻到超香浓嘅芝士味，啲芝士比较杰身，完全黐住晒所有鸡肉上，唔似其他店的鸡煲水汪汪，呢个芝士鸡脾肉好似焗烤芝士鸡咁，送红酒一流！是日自𢹂红、白酒各一。最后𠮶一两件特别沾满芝士焦，劲后悔冇叫大煲。 食完个鸡煲，其实个煲已经冇晒汁，侍应随即帮我地加浓汤，继续打边炉。又比我哋发现到好嘢，有个好似星加坡名产咁嘅黄金炸鱼皮，热辣辣沾满咸蛋黄香味。其他配料亦甚有水准，特级安格斯肥牛肥瘦适中！脆鲩腩、炸鱼片角、自家制响铃卷、台湾杂锦肠、川辣黄金皮蛋，仲有个黑豚肉超正！