喜鍋 海鮮‧火鍋‧小廚 (已結業)

去打边炉，汤底选择多嘅餐厅特别得我欢心，呢间位于油麻地地铁站附近嘅喜锅，有成18款汤底俾你拣， 搞到我哋挣扎咗好耐都唔知拣咩好。最后决定要花胶鲨鱼骨胶原汤，呢个汤饮就饮得多，用嚟打边炉就真系未试过。乳白色嘅汤底调味恰到好处，自然清甜，带有胶质，好养颜啊！汤水好味之余，仲非常足料，花胶煲到腍晒，衬未开始打边炉我已经饮咗好多碗啦！一台美食有牛坑腩、牛颈脊、珊瑚蚌、手打墨鱼丸...牛颈脊系牛身活动量最多嘅部位，口感爽滑，肉味香浓，切成薄片渌一渌就食得。牛坑腩每一块都带点牛筋同牛脂，食出肉质腍、牛筋爽、油脂香。珊瑚蚌渌得太耐就会变韧，灼一灼就最鲜味爽口啦。手打墨鱼丸Q爽弹牙，赞啊！压轴仲有香脆可口嘅脆米泡饭，加入汤底，米粒吸取晒汤嘅精华，滋味倍增！