鮮茶道 (已結業)

鮮茶道珍珠奶茶店位於The One 地庫比較隱蔽的位置，旁邊係Aeon超級市場，門面睇唔錯，不過幫襯嘅人唔多，珍珠奶茶一般都係奶味重茶味淡，跟飲奶冇乜分別，志在食佢啲煙韌珍珠，原本未幫襯過都有啲戒心，不過見佢哋沖出嚟嘅珍珠奶茶色澤比較深，估計茶味應該夠濃，就膽粗粗買一杯凍珍珠奶茶(少冰)試下。呢杯嘅珍珠奶茶賣相幾好，分量相當大，而且珍珠數量好多，就算將支飲管拉到杯面飲，都會吸到珍珠，茶味方面，我覺得比貢茶和歇腳亭濃厚，少冰嘅情況之下都仍然相當夠凍，估唔到呢間唔起眼嘅珍珠奶茶店出品都唔錯。