財記美食 (已結業)

之前分别试过晚饭小菜同早餐，小菜系唔错但早餐就反而麻麻(可能系唔同厨师嘅关系)，今次都系去食晚饭。分别点了西湖牛肉羮、酥炸鲮鱼球同避风塘茄子。先讲西湖牛肉羮，呢味𩠌喺茶餐厅好少见，上枱时见到我谂起码够七至八个人食。个羮好多芫荽，食落去好香，同埋都好多豆腐同牛肉，好足料。另外建议加落啲饭度食，好似食泡饭咁，系另一个食法，味道唔错。至于酥炸鲮鱼球，好大粒，同埋面层好脆，最紧要佢个蚬蚧酱，闻落去好香花雕酒味，而且都几多粒蚬肉，粒鲮鱼球点落去食简直系一流。最后到避风塘茄子，炸蒜够晒多，而且热辣辣，个脆浆调得唔错，食落去个皮唔厚同好脆，啲茄子又唔油，仲系软软哋身，外脆内软，口感几好。总括嚟讲食咗两次小菜，呢间真系唔错，每次未点𩠌就俾碗例汤你先，而且佢啲炸嘢特别出色，值得推介。