金泰園 (已結業)

今日又嚟到友愛村hands，話說近呢半年開咗間新泰菜，都未試過，由於我都真係好鍾意食泰國菜，所以今次就試下佢嘅下午茶睇下掂唔掂喇。下午茶索價30至40幾蚊，價錢合理，唔使加一。結果我哋就揀咗個豬手面，同埋泰式海鮮炒飯，試下佢功力有幾多先。泰式豬手湯金邊粉。金邊粉分量好多，我諗正常男人食都夠飽嘅，不過配料除咗一啲蔥花之外就冇乜喇，湯底都好飲嘅，但未至於濃味。豬手就放埋落碗麵嘅上面，冇另外用碟裝住，感覺有點扣分。豬手嘅數量其實都好少，皮較多，肉較少，豬手食落有啲韌。泰式海鮮炒飯。一落單轉頭就上菜，證明都已經係炒定嘅喇。海鮮有大蝦同蜆肉，飯都算乾身， 味道就還可以嘅， 不過就略為凍咗少少。凍奶茶。本身以為泰國餐廳，要凍奶茶應該係泰式嘅凍奶茶，不過嚟到嘅時候，就知道佢系一杯不折不扣嘅香港茶餐廳奶茶。不過噉又唔代表要扣分，因為凍奶茶茶濃奶滑，其實都幾好味， 飲品方面切合返香港人嘅口味其實都係一個唔錯嘅做法。