茶餐廳2.0 (已結業)

今日經過愉景新城見到間餐廳叫「茶餐廳2.0」覺得好特別，所以即入去試吓。餐廳食物選擇十分之豐富，除了有多款午市套餐之外，還有小菜套餐、喇沙套餐、中式粉麵飯、焗飯意粉和廚師精選等等。對於有選擇困難症嘅我，確實有啲麻煩，不過比我見到至愛嘅牛脷，所以立刻叫咗鹽燒牛脷雜菌意大利飯。羅宋湯湯夠濃郁，酸、辣度適中，而且有多款雜菜，依個羅宋湯絕對合格。鹽燒牛脷雜菌意大利飯牛脷夠大塊同厚切，外層燒到有少少鬆脆，內裏柔嫩，而且牛味濃郁，對於牛脷控嘅我絕對沒有失望。雜菌意大利飯嘅份量都唔少。咖啡咖啡係即磨，咖啡味濃郁，勝過不少茶餐廳。從餐廳嘅裝修和食物嘅質素來看，我相信2.0嘅意思就係茶餐廳嘅進化版。