BnR (已結業)

同屋企人嚟荃湾攞包裹，搞掂就顺便喺附近食埋晏先走。拣咗大坝街呢间「BnR」，餐厅主打浓鸡汤、鲜鱼汤同特色汤，有河粉、泡饭、米线、淮山面及小食等供应。点咗海南鸡淮山面、胡椒猪肚酿鱿鱼筒泡饭同炸蜜瓜奶，午市点任何主食均送热奶茶、热咖啡或汽水，星期六、日及公众假期除外。海南鸡淮山面汤头金黄鲜香，入口不油不腻，带浓郁鸡味。海南鸡皮爽肉嫩；淮山面煮得啱啱好，爽滑富弹性。配料下得很慷慨，有油条、云耳同粟米芯，份量十足。另外仲追加2只手工韭菜饺，采用上等猪肉和韭菜以全手工制作，外形胀卜卜，入口皮薄馅多。胡椒猪肚酿鱿鱼筒泡饭汤底味道好浓郁，带阵阵胡椒香，非常暖胃。猪肚爽口唔韧；鱿鱼筒入面酿满了墨鱼胶，食落弹牙有口感；饭粒浸得非常入味，令人回味无穷！炸蜜瓜奶外脆内软滑，入口有奶香之余又有果味，好睇又好食。