影片
更多
2012-01-19
158 浏览
Mia晌美孚区都算系间有名气嘅意菜小店，经常都爆满，一来由于店主兼厨师出身自大酒店（好似系新世界万丽同半岛任职过），自然有一定嘅实力；二来依区无间正式嘅意菜馆（唔好揾PizzaHut、PHD嚟比较），相对竞争性又细咗；三来就系全店只有14个位，叫做物以罕为贵，好易坐满，较容易做成长爆嘅景象。所以，依两年几，都系斋行过无帮衬，等佢人气无咁盛先去。依餐其实系小弟嘅生日饭，太太知我想去试好耐，就「指定」去依间，不过由打电话去订枱、当晚攞位都系由小弟负责，当然俾钱就佢负责啦。打到去问订枱，个店员就问我想订7:00pm、8:00pm定9:00pm，要准时交枱㖞，我心谂，仲系咪旺得咁紧要呀！不过，我觉得都系佢哋惯晒口，同埋以妨𠮶晚真系客多嘅话可以做多一两轮，买个保险。当晚小弟订咗8:00pm，准时到，但已经未见满，入门右边4人枱系吉嘅，左边亦有两张2人枱系吉嘅，即系得3枱客共6人，8:00pm𠮶轮就多两枱客共4人（连埋小弟同太太），再晏少少有多两位无订枱嘅女士入嚟，其后做过几个外卖客，我同太太食到九点松啲，都已经叫「包场」得番我俩公婆，之后都再无人嚟！可能依晚系周三，加上寒流袭港，有啲天寒地冻，比
依餐其实系小弟嘅生日饭，太太知我想去试好耐，就「指定」去依间，不过由打电话去订枱、当晚攞位都系由小弟负责，当然俾钱就佢负责啦。打到去问订枱，个店员就问我想订7:00pm、8:00pm定9:00pm，要准时交枱㖞，我心谂，仲系咪旺得咁紧要呀！不过，我觉得都系佢哋惯晒口，同埋以妨𠮶晚真系客多嘅话可以做多一两轮，买个保险。当晚小弟订咗8:00pm，准时到，但已经未见满，入门右边4人枱系吉嘅，左边亦有两张2人枱系吉嘅，即系得3枱客共6人，8:00pm𠮶轮就多两枱客共4人（连埋小弟同太太），再晏少少有多两位无订枱嘅女士入嚟，其后做过几个外卖客，我同太太食到九点松啲，都已经叫「包场」得番我俩公婆，之后都再无人嚟！可能依晚系周三，加上寒流袭港，有啲天寒地冻，比预期中少客。
对此店综合意见：小店设计简约，白色墙身、棕啡色木枱、黑色矮背皮椅，枱面都无任何摆设；四、五十蚊一客餐汤，八、九十，甚至过百大洋一客意粉，价钱唔算亲民，但食落知佢货真价实；虽然客唔多，上菜依然缓慢，正所谓慢工出细货，但绝对食得出水准同诚意。由于散叫唔平，晚餐成为必然首选，除非几款主菜都唔啱食，价位$105-$135，包沙律或餐汤，3拣1主菜，再配咖啡或茶，收加一服务费。今晚主菜方面，有忌廉野菌鸡柳配扁意粉（$105）、意大利风干火腿意粉配芝士忌廉汁（$125）同海鲜天使面配意式杂菜汤（$135），所以晚餐绝对抵食，而我哋就拣咗前两者。
Mia特色沙律我哋叫咗两个晚餐，就自然一个要沙律，另一个要餐汤。沙律可称为轻盈简单，睇图辨物，有罗马生菜伴以油醋汁做底，再放上几片鲜蘑菇片、车厘茄、细条青瓜片，生菜爽脆，汁酱清新，作为前奏开胃至极。可能师傅都几钟意「菌」，沙律同两个主菜，都有菌出现！
是日餐汤是日精选餐汤系粟米忌廉汤，当然唔系家常𠮶只罐头粟米汤啦。橙黄色嘅忌廉汤，卖相平平无奇，通常会晌汤面加啲忌廉整靓佢都无，但一啖饮落，粟米味劲浓郁啰，质感幼滑无起粒，真材实料得无嘢讲。散叫有个野菌忌廉汤，卖到成$58一客，有机会真系要试试！
忌廉野菌鸡柳配扁意粉卖相绝对讲得样样衰衰唔靓仔，睇落好普通咁款，但摆入口就唔会当佢系堆乱草，依啲咪叫做味道啰！首先，依晚出面真系几寒，而碟扁意粉送嚟时热辣辣，食落令人暖笠笠，很窝心嘅感觉，忌廉汁好足，令每箸扁意粉都挂满汁；鸡柳虽然唔系话好突出，但感觉唔似雪藏货；最精彩就系个野菌，虽然啲菌望落去都系「黑孖孖」，但大致都睇到又食到有好几款野菌，临离开时因为见无晒客，师傅都忙完晌后面厨房hea紧，所以就问佢因乜做到个味咁浓郁野菌香，佢话用咗木耳、磨菇、鸡脾落、大菇同黑松露酱，果然落足料，唔怪得咁正；至于啲扁意粉，啲人钟意话意粉好食叫一句al dente，意粉柔韧度啱啱好，柔软得嚟咬落带点韧劲，简单一句有嚼劲就系啦。仲有，唔好睇佢好似细细碟，食落原来都有几多。
意大利风干火腿意粉配芝士忌廉汁依个主菜晌卖相就相对出众得多，意粉之上放有好多大菇片同菜苗，最上就系卷为花状嘅巴马火腿，再碎洒即刨巴马臣芝士，睇见已好想快啲将佢哋放入口喇。3大片巴马火腿，意大利来货，虽然无问师傅依条火腿风干咗几多个月，但食落甘香唔肥，太太一向都对肥牛、烟肉都怕怕，但依个巴马火腿佢话好啱佢。芝士忌廉汁，又系加咗巴马臣芝士做，好香好浓够稠，汁酱够多，每箸意粉同样都可以挂满汁，不愧为当过大酒店酱汁部主管，酱汁真有一手；中层嘅大菇片同菜苗都好味，而且有中和火腿嘅甘香同汁酱嘅浓腻；意粉同样做得出色，煮得啱啱好，有咬口，有嚼劲！所以，小弟觉得依道意粉真系做到色香味全，太太同我都细意品尝，亦好满意两个主菜。
附送餐饮本来餐饮好多时都无咩好讲，但今次就有话儿喇。我点𠮶杯热咖啡，香但系唔浓，闻到咖啡香，但饮落唔浓，好似系落冲即溶咖啡粉时，要落两匙羹咖啡粉嚟冲一杯，依家就好似落得一羹半，个味淡咗，还好啲奶系热辣嘅，否则令到杯咖啡又唔浓、又唔热就无瘾！相反，太太杯热柠水就卖大包，查实只茶杯又唔系好大，用唔著俾4块柠檬咁多嘅，除非系跟热水壶上，就叫做可以冲多杯啫，哈哈！
甜品如果想完满啲，食晚餐可另外加钱配甜品，+$20系是日甜品，依晚系朱古力慕丝，+$30系意大利芝士饼，不过店员话无货。但一早太太已经唔准我叫甜品，因为佢已经准备咗个awfully chocolate嘅朱古力香蕉蛋糕晌屋企喇，仲点会叫甜品丫！哈哈！
张贴
