陶源酒家 (已結業)

拆礼日加红日，巨盒附近时见有动漫穿戴之靓仔靓女周街行，可能觅食，估计依佢哋造型唔会去品茶啩，又，横掂大部分酒楼都唔会有特价点心各样，索性拣间所有俾分位都中上嘅酒家，例如陶源。早上11点到，接近一整年冇帮衬，果然都维持到状态。装修系有啲显旧，不过依然keep得地方干净。乳鸽皮脆肉嫩，窝心哋按人数奉上相应透明手套。咬开时油份肉汁缓缓渗出，难得冇其他地方嘅乳鸽咁咸，如果钟意偏淡味，连淮盐都可悭番，更原汁原味，价钱$38只算相宜，唔怪得旁边几枱客都嗌。别有洞天鸳鸯肠，质感系米网卷，黑色那边估计用墨鱼汁做成肠粉皮，内里卷住剁碎猪肉、菇菌，白色那边内里系鲜虾，中间缚住3条韮菜花做装饰。食过几间酒楼整嘅太极鸳鸯饭，最重料、多汁系呢间，白汁𠮶边用左剥壳新鲜虾，冇乜雪味，红白两边啲汁都够包哂啲饭，所以口感会似食意大利饭。鸳鸯香煎腊肠卷（咁啱今次嗌三味𩠌都「鸳鸯」），唔止腊肠，仲有膶肠、芋头切条，膶肠味抢过腊肠，油香带甘，包同芋头又吸收咗啲腊味味，包亦甘甜。虽然每枱冇保温壶热水，不过茶壶开盖，待应五分钟就会嚟加水。