老鳳冰室 (已結業)

今日晏昼同同事去老凤食饭，第一次认识老凤系喺深水埗，果次（几年前）食完已经觉得好印象深刻。无论系内部装修（十分有昔日香港情怀），或者系食物选择或质素，都令人想一再光临。葵芳哩间我都嚟过好几次，内部装修及摆设好特别同好用心，好友旧日香港嘅感觉，墙上边仲挂住一只大金凤同一架大火车，亦写有会令人会心微笑嘅金句。每次入到餐厅，都好似去咗另一个时空一样，会令人不禁周围望，去欣赏佢嘅独特设计。至于食物，老凤每次嘅质素都好高好稳定，试过好多款唔同嘅小食（例如：黑松露滑蛋多士、蜜焦鸡翼、肉酱焗薯泥等）同主食（芝士牛肉浓茄汤通、韩式炸鸡芝士保龄球等），大部份都好好食，用料份量十足，绝对系一间好有诚意，食物质素对得住价钱嘅高汁茶餐厅！而今日，我就叫咗咖哩滑蛋猪颈肉饭，佢嘅咖哩汁真系好出色，咖哩味好香好浓同带有淡淡嘅香辣味同甜味，送饭真系一流、好开胃！滑蛋炒得好靓同真系滑嘅，蛋味好香，炒嘅时间控制得啱啱好，唔会太水汪汪或太硬。猪颈肉都好食，肉质弹牙而唔硬，肉味好香，掂呀！好满足的一个午餐，好好咁为下昼嘅工作叉足电。但我觉得环境可能要留意一吓，餐厅内间唔中会有阵阵坑渠味，特别系近洗碗𠮶一边⋯⋯