影片
更多
2014-07-13
3206 浏览
本来同几个朋友专程嚟大坑试一试甚有人气嘅The Pudding Nouveau，点知，无谂过星期四喺佢休息日，摸晒门钉，既然几个人一场嚟到，无理由就咁散场，大家肚饿都要揾饭食架。记得晌街口嘅PizzaZaZa都几唔错，所以，改嚟食餐意大利晚餐。店铺唔算好大，一字长形，虽然一张枱拍住一张枱，不过，胜在楼底极高，所以，空间感仍十足。虽然无乜意国风情，但简约嘅装修，让人有份悠闲嘅感觉。讲到食物嘅选择，餐牌一页过睇晒，分为4大类：前菜、热汤、意粉、薄饼（或全麦薄饼），除两款热汤外，其他类别都有7、8样选择。而饮品餐牌则包括咗数款餐酒、啤酒、鸡尾酒及非酒精嘅鸡尾酒，望落去定价属中等左右。面包篮 $5 /位好多时出面一啲欧陆餐厅，都会免费送上面包篮，我哋一坐落无耐，亦都送上一小篮共3款嘅面包篮，埋单时先知原来要收费，$5 /位，虽然喺小数目，不过，$5面包钱都要收就感觉有少少核突啫。面包未至冷冰冰，但就一定唔暖，其中嘅意大利香草包（focaccia）仲有少少干，小麦拖鞋包（Ciabatta）都OK，棍子面包条（grissini）松脆就最得众人欢心。反而酱汁的骰有啲心思，黑醋橄榄油、香草汁和蕃茄沙沙
店铺唔算好大，一字长形，虽然一张枱拍住一张枱，不过，胜在楼底极高，所以，空间感仍十足。虽然无乜意国风情，但简约嘅装修，让人有份悠闲嘅感觉。
讲到食物嘅选择，餐牌一页过睇晒，分为4大类：前菜、热汤、意粉、薄饼（或全麦薄饼），除两款热汤外，其他类别都有7、8样选择。
而饮品餐牌则包括咗数款餐酒、啤酒、鸡尾酒及非酒精嘅鸡尾酒，望落去定价属中等左右。
面包篮 $5 /位好多时出面一啲欧陆餐厅，都会免费送上面包篮，我哋一坐落无耐，亦都送上一小篮共3款嘅面包篮，埋单时先知原来要收费，$5 /位，虽然喺小数目，不过，$5面包钱都要收就感觉有少少核突啫。面包未至冷冰冰，但就一定唔暖，其中嘅意大利香草包（focaccia）仲有少少干，小麦拖鞋包（Ciabatta）都OK，棍子面包条（grissini）松脆就最得众人欢心。反而酱汁的骰有啲心思，黑醋橄榄油、香草汁和蕃茄沙沙，味道各有不同。
杂菜沙律配茴香、西芹、榛子及香橙汁 $88一共有7款沙律可供选择，当中有5款喺推介嚟，会唔会滥咗啲呢？点都好，拣咗其中一款杂菜沙律，其实个沙律底无咩特别，只不过喺紫椰菜同罗马生菜，但就配料几有趣：茴香、西芹、榛子，尤其前两者，令个沙律嘅味道几特别，配合埋橙肉及新鲜橙汁，有份鲜甜清新嘅感觉。
自家制云吞酿蟹肉及软芝士配蕃茄及松叶蟹脚 $188意大利粉或意大利类亦有7款选择，当中又喺拣咗属推介之一嘅蟹肉意大利云吞。一客只有3只意大利云吞，每只都算做得大粒，而且伴有一条松叶蟹脚，颇有睇头，条松叶蟹脚味道亦唔错，挺鲜味，然而，酱汁有啲普通，大概有啲似一般嘅洋葱汁。至于啲蟹肉云吞，内里酿满蟹肉及马卡风芝士，由于马卡风芝士属味淡嘅芝士，所以，都无乜点抢去蟹肉嘅鲜甜；其实个皮唔算厚，不过，口感就有啲韧，似似哋煮唔熟、煮唔透嘅感觉啫。
牛肝菌烟熏水牛芝士全麦薄饼 $168以Pizza作为店名嘅一部份，薄饼自不然喺店内最耍家嘅出品，而薄饼分咗一般常见嘅面粉所做嘅饼底之外，仲有另一类叫全麦薄饼（whole wheat pizza），市面极少见，当然要试一试啦。对比起有成8款嘅普通薄饼，全麦薄饼亦只得两款：Coppa腌猪肩颈肉及Porcini牛肝菌烟熏水牛芝士。选后者因为大家都喺爱菌之人，牛肝菌的确几香，蕃茄酱及水牛芝士落料十足，又加有少少香草，又真喺几好食。全麦薄饼口感比较粗犷，另外搓得够薄，入口几松脆。
以一间小店嚟讲，甜品有5款选择算唔少，单睇名字都喺啲精选制作。如想加杯咖啡或茶，都只喺多俾$10，就算要意式泡沫咖啡或鲜奶咖啡，都只不过喺$16，超级划算！
意式芝士蛋糕配咖啡汁 $68卖相的的骰骰嘅意式芝士蛋糕（Tiramisu），单以「蛋糕」部份而言，甚具水准，饼底沾满咖啡酒香，而中心马卡风芝士软滑轻盈。但整体嚟讲，买相比较粗，只喺糁上唂咕粉及唧上少少咖啡汁，但味道喺焦糖味㖞！原来，睇返个名，英文写住「classic tiramisu with caramel and coffee sauce」，真喺唔明点解中文会无咗「焦糖」二字，而且，唧𠮶少少，跟本试唔到几多，况且，件蛋糕索价唔平。
肉桂脆配栗子蓉及朱古力汁 $88西班牙甜品Churros，都食过好几次，一般都好似小型油炸鬼咁，几吋长一条条，炸好再沾满沙糖同肉桂粉，之后蘸朱古力酱食。但今次个Churros炸面粉条甜品，就极之有惊喜。首先，都好钟意店家所用嘅译名「肉桂脆」，做成环形上下两层，再加入栗子蓉，装饰仲有栗子雪糕及红桑莓，相卖立体唔单调。而个肉桂脆既香且脆，肉桂味突出，而栗子蓉柔滑粉甜，至于「朱古力汁」只喺底下一抹，用于卖相多过实际。
服务方面，普普通通，感觉店员似乎主要招呼几枱熟客居多。几款食物，整体而言，有好有唔好，拉平均计，可以讲喺OK高少少。成日话啲「男人沙沙滚」即喺搞啲唔正经嘢，但嚟到PizzaZaZa，个牛肝菌全麦薄饼值得一试，记住佢个正名叫Porcini，「ZaZa菌」唔知会唔会成为佢个别称！
张贴
