船皇 (謝斐道) (已結業)

系香港食过几间船面都觉得麻麻，有d为左迎合香港人口味而失去正宗船面应有风味，今晚等我黎到呢间过江龙船皇睇下揾唔揾到泰国原味。餐牌简而精，汤面、捞面、小食同饮品一眼睇晒，反转就可拣埋食咩面。泰式粉面店必备调味架，辣椒粉、辣椒醋、鱼露。最初以为泰式炸虾卷系普通脆皮包住只虾，上菜一望觉得好似萝卜丝酥饼几特别，咬开发现外层系薯仔丝，外脆内软，劲香口。串烧鸡肉无烧到过火，几香，肉唔鞋，点埋沙嗲几正。讲下船面ge灵魂汤底先，入口充满牛味，亦带点药材味，微辣香甜，贴近泰国当地食到ge味道，正。船皇汤面集猪、鸡、牛于一碗，肉香滑软腍，丸十分弹牙，用左泰国货，远胜街市雪藏丸，炸猪皮好脆，一d油膉味都无。传统船面系细细碗一连食几碗，船皇都可以咁叫，但香港地秒秒钟几廿万上落，所以我拣左大碗河粉，好阔身，挂汤一流，份量又多，饱啊！冻泰仔奶茶用泰国银碗装住，由于预先冲好再雪，无得叫少甜，但比起「泰国甜」已经相当留手，香滑好饮。