養心亭

营业中

休息中

果日同老婆行開荃豐買電腦野，見6點幾又無晚市，一路行下附近又乜好食，行下行下去到荃昌，見到有間招牌小小古式叫養心亭，心諗藥膳既野唔係我杯茶，不過老婆話呢排食得煎炸野多，不如試下d健康d既野，咁就試下買外賣。歸到家見微暖就梗係即刻食，話曬雞湯就梗係先飲啖湯，一心諗住藥膳黎煮既野會唔會好大浸藥材味，係有d不過估唔到又好好味，d湯仲好有住家feel，再試下d雞都好滑唔"鞋"，同埋幾鬼死足料，目測真係 1/4隻雞，62蚊外賣仲有折，性價比已經確得超抵，另外再試試老婆個嫩雞湯，都好鬼死清甜。聽收銀姐姐講叫我下次試下個肉骨茶同喇沙，下次一於試下先。另外小食我唔係好食得辣，所以麻辣都係揀小辣，個人推介最正牛肚絲，切得好幼身索曬d麻辣汁，送飯一流。如果下次我想再試就係堂食，再熱辣辣d食應該感覺會更好，個人都好小寫食評，不過又平又正又有heart既小店買小見小，點都要推介下。