蘇媽.蘇媽馬來西亞茶餐室 (已結業)

发迹于深水埗嘅苏妈·苏妈陆续开分店，最近仲开到去尖沙咀加连威老道，当然要带埋老公嚟试吓。尖沙咀分店嘅餐牌同深水埗嘅基本上大同小异。餐厅入面嘅环境比老店更干净企理，装修亦有马拉华人风格。枱上已经放有黑豉油、头抽、辣椒同蒜蓉，原来系用嚟点肉骨茶入面嘅配料。枱上嘅餐纸仲有教你点样调配。落咗单点咗百吉爹肉骨茶之后，店员随即奉上两碗热辣辣嘅肉骨茶，而呢个汤系无限添饮，都系苏妈苏妈出名之处。百吉爹肉骨茶有数款唔同嘅食材可供选择，今次我哋就拣咗啫喱骨，其实即系类似我哋平时食开嘅猪软骨，总共有四大件，啫喱骨之下仲有豆卜同金菇，我觉得呢个系喺多款肉骨茶入面性价比最高嘅一款。海南鸳鸯烧面包嘅面包比较深色，带有一种特别嘅香味，再加上入面一层厚厚嘅牛油以及咖央酱，热辣辣非常好味。辣死你吗系我最推介嘅主食，最钟意佢嘅花生同干鱼仔配上椰浆饭，今次拣咗配参巴鱿鱼，鱿鱼相对地都几辣，不过又觉得好惹味。马拉沙嗲串烧分别有猪、牛、鸡，而且系任意配搭。佢嘅沙嗲酱充满浓浓嘅花生味道，非常香口。由于食完辣嘢，所以都决定饮番杯恐龙下蛋，冰冻白咖啡上面配上一球云呢拿雪糕，再加有朱古力波同美禄粉，大人细路都钟意。