Boring?! (黃埔天地美食坊) (已結業)

餐厅位于在黄埔蔡澜美食坊，印像中上一次嚟蔡澜美食坊食饭系食咏藜园，都有好几年前喇，今日喺同事嘅驱使之下旧地重游，估唔到喺蔡澜美食坊都有间咁有情调嘅西餐厅。松露野菌泡沫忌廉汤，忌廉汤一放上枱已经散发住好香浓嘅黑松露味，作为配角嘅多士，餐厅嘅制作亦都相当认真，面头除咗蒜蓉同埋芝士之外仲烘得相当松脆，夹住个汤一齐食相当好味。香芒大虾沙律，大虾沙律卖相精致，大虾个子不少，特别钟意佢除咗喺沙律菜上面放有芒果酱之外，仲有一粒粒嘅新鲜芒果喺隔离。德国脆皮咸猪手配酸椰菜及蜜糖芥末籽汁，厨师已经预先将猪手切开，食起上嚟非常方便，猪手个皮脆到无朋友，点少少蜜糖芥末子汁更加好味。美国肉眼扒配薯菜，肉眼扒一上枱见到个格仔碳烤网纹已经令人食指大动，牛扒嘅熟度拣咗 medium，厨师将火候掌握得好好，一刀切开系娇嫩嘅粉红色，牛味香浓，令人非常满足；配菜有车厘茄、西兰花、椰菜花同埋薯仔，不得不提薯仔经过走油处理，诚意十足。