榮昌茶座

营业中

休息中

喺呢间餐厅食过三四次饭，冇一次有影相，因为每次都系客请食饭，我一般都唔会影啲食物，亦因为系咁所以冇谂过会写佢嘅食评。平时喺呢度食饭，我连餐牌都懒揭，只会叫是日午餐，算食得好简单，今日比较特别，个客拍紧车，未入到来，就攞个餐牌揭下，发现阿苏曾讲过呢度有全港最好食嘅猪朳包，有咁高嘅评价，本来想叫个试下，但系𠮶日系入冬以来最冻嘅一日，一个包根本唔够饱，因为唔系自己埋单，又叫包又叫饭唔系咁好意思，所以叫左个猪朳饭食算。豉油猪朳饭 HK$42睇啲猪朳骨位并非据口，估计系新鲜朳，一啖咬落验证无误，充满肉汁，鲜甜异常，而且不带雪味，猪朳确系得！但系猪份量真系颇细，最多得块半(切开哂) ，佢地间铺响啲上水吊脚位，铺租平，讲真件头可以大番啲，唔好咁寒酸；仲有佢地碟饭都好细碟，以当日咁冻嘅天气嚟讲，我系唔多够嘅。总结 :虽然味道唔错，应该未至于好似阿苏讲到嘅全港最好咁正， 加埋杯HK$16嘅热柠蜜，呢餐饭要HK$58，性价比只系一般。