Cafe Siam (The Plaza ) (已結業)

今日咁啱去中环揾个朋友，经过兰桂坊，见到想试好耐嘅cafe siam，就一于去试吓佢嘅晚餐。贯彻兰桂芳特色，环境比较昏暗！一坐低侍应就拎咗碟虾片过来，好香口！Cafe siam 喺一楼上面，装修有东南亚风格，座位亦都十分宽敞。食物方面首先我哋叫咗一个炸软壳蟹沙律，佢嘅沙律份量都几大而且味道清新，系一个好开胃嘅前菜。主菜方面我哋分别叫咗一个糖醋猪仔骨，甜甜酸酸咁，猪仔骨亦都炆得好入味，平时钟意食京都骨嘅人不容错过。之后我哋亦都叫咗一个虾头膏海鲜炒饭，呢个海鲜炒饭用料十足而且虾头膏好香，简直系绝配。而一向钟意食椰苗既我就叫左一个蒜香椒丝炒椰苗，佢用咗泰式嘅香料加埋蒜同椒丝，令人欲罢不能。食完咁多主菜梗系要食一食个甜品，我哋叫咗一个椰汁雪葩，椰汁味香浓而且软滑食完一个都唔会济。总括而言，cafe siam 好适合朋友聚会同埋约埋三两知己一齐享受一顿丰富嘅晚餐。