HABITŪ caffè (已結業)

有事要过嚟金钟政府合署搞点事，返公司途中，经过依间Caffe Habitu，因为仲未够12:00nn食晏时间，所以偌大嘅店舖，都无乜几多个客，在门外已闻到阵阵咖啡香，既然难得经过（平时极少晌金钟留下小弟行踪），就蛇一蛇王，入去叹番杯咖啡先再上路。拣咗一入门口左边窗门位，对著外街，看住匆匆走过嘅路人甲乙丙，自己却安座晌宽阔嘅梳化之上，再睇睇书，虽然一阵要返去公司个人间炼狱，但系顷刻间几有偷得浮生半日闲嘅愉快。点了一杯12安士鲜奶咖啡，店员随手整个无乜难度嘅心形拉花，以佢哋日拉夜拉嚟讲，依次唔算拉得好靓，而且杯身仲有少少溢泻嘅咖啡渍。小弟对咖啡唔系咩专业，闲时都系晌屋企或公司冲三合一，但讲到眼前杯咖啡本身，咖啡味香，口感柔和细滑，无涩无酸，啱晒我嘅口味。虽然只系蛇咗半笠钟时间，返到公司都系等食晏，不过，松一松心灵倍感轻松！有人话三十几蚊买杯咖啡贵，如果你心态系觉得用咗三十几蚊净系买到杯咖啡，确系几贵，不如过隔离嘅MacCafe饮杯就算。但除咗咖啡以外，其实你仲享受咗宽敞嘅空间、宁静嘅环境同舒适嘅梳化椅，三十零蚊一啲都唔叫贵！