一幻拉麵 (已結業)

喺新宿食过一次，一试难忘！除左一兰，呢间系第二间过江龙拉面店我会愿意花时间排队。中午1点去到，等左40分钟，终于有位。好彩今日天气唔算太热，所以等40分钟都可以。排队期间，职员已经俾定纸仔我地填。口味除左原味虾汤，仲可以要豚骨，不过本人觉得原味先可以食到虾汤既精髓。入到去第一个感觉系冷气好足够，夏天食拉面如果唔够冷气会好辛苦。而且座位好宽敞，一啲都唔迫，坐得好舒服。同男友一人一碗拉面，再加一个虾饭团。我拣左原味虾油盐味粗面。拉面一到，影完相之后，第一件事当然系饮啖汤啦。如果未去过日本分店食，会觉得汤底好浓，虾味好突出。但如果有比较之下，就一定觉得日本汤底浓味好多。面质方面，都有3款，我拣左粗面，因为我自己比较钟意食有质感既拉面。每一条粗面都非常弹牙，又唔会太淋，软硬适中。香港分店限定虾味饭团，一场黎到点都要试下。建议先食饭团，后食拉面。咁样一来包住饭团块紫菜唔会因为接触空气太耐而淋左，二来食完拉面饮完汤，口腔已经充满浓烈虾味，再食饭团，就试唔真饭团既虾味道。店内职员都好好礼貌，如果未试过既朋友，都不妨一试！