嘉年華海鮮酒家 (已結業)

早几日经过见到加设咗任食火锅，趁weekend嚟试吓。酒楼面积大，不过冇几耐差唔多坐满。我谂任食火锅喺度应该几受街坊欢迎，一来呢度除咗一间＂地道＂酒楼有任食外，其他全部都系散嗌。而且价钱优惠，平日$118，假日$138全包，仲有鸡煲拣，一家大细食最啱。酱料同部份火锅料系自助，而且有少量熟食供应，真系好耐冇试过呢种火锅方式。熟食方面有咖喱鱼蛋猪皮、萝卜牛腩、炒粉面饭等。唔讲究卖相嘅话，味道都唔错。鸡煲味道还可，不过唔系麻辣𠮶只，亦冇出面食开有好多花椒芹菜嘅惹味。鸡件偏细多骨，冇鸡味。肥牛、水饺同部份丸要填火锅纸。肥牛喺任食嘅质素嚟讲算唔错，饺类始终系偏细只，食皮多过食馅。肠、炸鱼皮、菜等都系自助。好多都系standard嘢，唔会太差。推介嘅系腐皮卷，其实十足点心料，不过用嚟打边炉都好好食。但炸鱼皮就淋咗，食咗一小块已放弃。酒楼本身环境一般，加咗任食之后更加似屋村式酒楼。不过主要街坊生意，又唔会讲究咁多嘅。以呢个价钱，有呢个食物质素已超值。下次唔想煮饭而又想打边炉嘅话，都会考虑吓呢度。