新贊記點心·小廚

营业中

休息中

最近迷上点心店，贪佢价钱实惠，食物质素亦唔输蚀俾一般嘅茶楼，今日放工同先生揾到公司附近呢间新开张冇耐嘅点心店，叹返个夜茶。餐厅点心选择唔少，茶位费六蚊位，质素可以，仲免收加一，非常抵食。鲜虾烧卖皇粒粒饱满，非常足料，面头嘅蟹籽亦俾得豪爽，一啖放入口，味道鲜美，口感弹牙。黑椒金钱肚酱汁味道香浓，入味之余非常爽口。北菇棉花鸡味道鲜甜，特别系鱼肚，吸收哂鸡汁嘅精华，松软入味。脆皮鲜虾肠份量足，内馅更加系足料，软滑嘅肠粉包住香脆嘅脆网同弹牙嘅虾肉，无论味道同口感都抵赞。炒萝卜糕外脆内软，用上自家制XO酱去炒，零舍香口惹味，系先生嘅最爱。白灼油菜心份量颇多，鲜嫩翠绿，软腍无渣。酥炸奶皇包一客一件，先生本来想叫炸馒头，后来见到有炸奶皇包，不妨一试，果然冇令人失望，外层炸得香脆而且唔油腻，奶黄馅带少少流沙质感，仲有淡淡嘅咸蛋黄滋味，非常推荐。姜汁千层糕非常「够姜」，入口带有姜汁独特嘅辛辣感，甜度唔高，口感烟韧。点心店嘅食物整体唔错，即叫即蒸热辣辣送上，两个人食到捧住肚皮走都只系百零蚊一位，街坊价钱酒楼质素，店内空间宽敞而且座位舒适，系叹夜茶嘅好选择。