赤橋拉麵 (已結業)

一直有听闻过赤桥拉面，响新界西几出名下，地位拍得住元朗嘅「彩」。可惜红桥呢个位置有少少唔方便，于是一直无机会去试。呢次星期六晚大概八点去到，虽然只系一个人去食，但系都排咗大约35分钟队，大概有10个人等紧。由于舖头非常细，只有十多个位置嘅关系，所以大家去得就预咗要等一段时间。面嘅汤底只有鱼介、黑油同海老三款，但系全部可以拣汤面或者沾面。由于本人系虾汤控嘅关系，谂都唔洗谂就拣咗海老沾面（$85），另外加三只饺子（$15）。面本身比较硬身，沾面嚟讲硬度系控制得几好，面亦都挂汤。至于汤底，可能因为食呢间嘅前两日食咗北海道嚟嘅一幻，所以相比之下就略嫌失色了。呢间嘅汤底咸咗少少，而且欠缺咗虾汤应有嘅香味，即系虾油𠮶种令人垂涎欲滴嘅味道，只有躯壳而无灵魂。至于饺子，表现亦平平，煎得唔够脆，上台时候已经淋咗，馅料就系猪肉加菜，正常馅料，但唔会令人有想encore嘅冲动。总括嚟讲，如果住响屯门元朗天水围嘅朋友，想食间唔错嘅拉面，呢度的确系选择。但如果要山长水远特登入嚟而且仲要排咁耐队嘅话，就绝对唔值得了。