中哥廚房 (已結業)

友人寿辰，约咗周五晚去唱K庆祝，小肥早收，所以就先去咗接honey，然后就喺佢屋企附近o既「中哥厨房」医肚打底。小店于太阳落山冇耐后就经已八成满，埋位一刻彷佛已为食客打下强心针。谂食咩前，当然系要先啤一啤佢啦！店子内外都摆出黑板推介不同菜式。镜面同玻璃窗上则贴出多款𩠌菜o既彩图及简介。细佬就凭餐垫上及餐牌薄内多幅插图点咗几味小菜做当日o既头轮晚餐。大厨特别推介之脆皮牛腩（$118）：金黄色o既脆皮牛腩外层极之松化干巧，当真超级脆皮！意外地，炸煮o既牛腩一啲都唔嚡唔干，食落厚腍入味，超！大厨特别推介之招牌士多啤梨骨（$88）：士多啤梨骨香甜爽润，清新怡人，不过如果排骨可以切细件啲，相信会更易入口。大厨特别推介之中哥小炒皇（$90）：热力十足o既小炒皇好够镬气，韭菜脆嫩爽甜，惹味非常。榄菜肉崧炆秋葵（$75）：因为早一个礼拜喺间居酒屋度食过啲又大又好味o既秋葵，故今次点食蔬菜时一见到有秋葵食，谂都唔洗谂就叫咗黎试。以榄菜肉崧炆煮o既秋葵味浓脆身，味道极之讨好。「中哥厨房」属街坊小店，楼面伙记亲切友善，其中一人虽为聋哑人士，但其细心之态度绝不比他人逊色，餐店小炒美味抵食，个人觉得绝对值得支持