富臨皇宮 (已結業)

友人乔迁欣荣花园入伙，上去探吓小朋友，友人盛意拳拳邀请留下晚饭，楼下有富临皇宫，近近地都好。以前食过富临皇宫其他分店，感觉上质素麻麻，不过友人话都几好咁是但啦！见到有龙趸两食228，依家喺街市买龙趸肉炒球都要过百，酒楼有人整埋都抵食。龙趸肉多骨少，小朋友都食到，就叫呢个。另外做紧特价烧鹅例牌20蚊，真系抵到极，又叫。再叫多个泰皇虾腰炒通菜，三大一小都够食喇。烧鹅例牌都有脾位，虽然件数不多，但20蚊真系冇得要求。烧鹅微暖，鹅皮尚叫脆口，鹅肉比较痴骨，可能紧紧熟，烧得透啲会更好。清蒸龙趸头腩有少少碎骨，大人比较啱食。龙趸头腩都有好多肉，龙趸皮胶质丰富。西兰花炒龙趸球嘅龙趸球就啖啖肉，小朋友都钟意食，西兰花比较硬，炒耐少少腍返啲会更好食。泰皇虾腰炒通菜几惹味，都有唔少虾仔，个菜唔算辣，咸香味浓啲。四个人都系食咗400蚊，街坊酒楼有时唔煮饭落楼食不失为好选择。