泰苑小食

营业中

休息中

经过𠮶两层行仲快过搭嘅扶手电梯，又再嘟多次安心作为入熟食中心凭证后，推门就去番我熟悉嘅《泰苑小食》。是日免费搭车，加上自从通咗宋皇台站之后，整个九龙城又跃动起嚟，于是带挈埋呢区食肆生意。由之前企舖门口热情招呼你入去坐，到依家唔齐人唔俾入，或限时交枱，或不容加单……因此呢啲繁忙时间，宁愿去番啲规矩冇咁多嘅舖。其实泰苑唔算小食，绝对系小馆。冇嚟将近一年，品质keep到，炸虾饼又弹牙又脆，食多旧都唔滞。串烧鸡牛猪本嚟就系家人必叫。呢间串烧肯定全熟，配点𠮶个沙嗲酱汁亦好惹味，但就要不停强迫症咁自行𦧲哂啲㶶肉边……食紧热气嘢特别想饮沙冰，尤其现场冷气唔大，体感廿五六度，嗌咗青柠、菠萝，超大杯饮极都有咁。近来去泰菜馆都爱上泰式炒粉丝，少少酸甜。粉丝、剥壳鲜虾留尾、花生碎…..有齐滑、爽、弹牙、少硬颗粒口感。特别想食软壳蟹，冇配青芒沙律改用咖喱，大概6件，食到其中一件有浓稠蟹膏喺口腔绽放不知何故有啲中细奖嘅感觉。