皇苑 (已結業)

嚟到筲箕湾嘅选择真系多，由街头小食到特色餐厅，应有尽有！不过，今日就去到一间新开嘅酒楼－－皇苑，试吓小菜，睇吓佢应唔应该留低啦！玛卡螺头炖鸡汤：原盅炖汤，热辣辣，仲好足料添，好暖好滋润呀！A姐一饮完就问，乜马卡龙都可以煲汤咩？！真系攞你命三千！唔系马卡龙，系被称为「秘鲁人参」嘅玛卡，餐牌仲详细写明玛卡嘅营养价值，食完会补充精神同无咁易疲劳，啱晒我呢啲日做夜做打工仔！怀旧拔丝骨：拔丝番薯就食过喇，拔丝骨就真系第一次。上碟见到有青椒、红椒、香桃同洋葱伴碟，当然唔少得炸到金黄色嘅主角拔丝骨啦！呢个菜净系睇已经色彩缤纷，已经忍唔住即刻挟一件嚟试，成条糖丝拉出嚟，望见都好惊好甜，好彩酸甜平衡啱啱好，啖啖肉仲好香脆添！但记住要趁热食，如果唔系糖浆变硬就后悔莫及！沙嗲粉丝蟹煲：煲盖一打开就闻到好香浓嘅沙嗲味，成只蟹加埋大量粉丝，份量一啲都唔输蚀！不过，蟹盖就唔见膏，好彩肉都唔少，仲好鲜甜添！而粉丝就系A姐最爱，索晒沙嗲味好正呀！咕噜虾球：脆卜卜得嚟又唔厚粉，虾肉好爽，又酸、又甜、镬气一流，最重要系唔会多汁到一pat pat，唔错。