百匯酒家 (已結業)

纯粹见佢地点邻近红van总站，临入去石澳泳滩前饮个早午茶。正门去番东大街方向入。十点松啲仲系早餐时段，冇得嗌炒嘢，所以成枱得点心，顶多有盅饭。双宝入面柴鱼猪骨粥嚟到差啲以为白粥，𢳂咗四五下先揾到一粒仔猪骨，柴鱼碎丝好似没入咗碗粥，基本不多见，当白粥食嘅感受；煎酿茄子还可以，至少鲮鱼肉唔会无啦啦食到有鱼骨，茄子冇过生过老。红油抄手想跟番大陆𠮶啲做得的的骰骰细细粒，汁底预咗佢做唔到咩层次，但馅料毫无猪肉鲜味、饺子皮质感亦一般，埋尾堆叠出嚟𠮶块厚皮都忍唔住咬走唔要。少见仲有猪脚姜，蛋冇变铁蛋尚且柔滑感，猪脚炆得几够腍除咗骨外全部咬到食到，醋底系预期内始终唔及自家煲嘅浓厚。