金記冰室 (八號花園) (已結業)

疫情期间不宜外出用膳，所以近排都多咗留喺屋企食饭。今日想躲下懒，老公提议不如近近哋，去附近买外卖，唔使煮又唔使洗，干手净脚。拣咗位于康怡广场嘅街坊饭堂「金记冰室」，估唔到嚟到嘅时候只系啱啱过咗六点钟，门口已经企满等外卖嘅客人，可见附近嘅街坊都相当捧场。拣咗两个晚市套餐，套餐包热饮同是日例汤，这晚嘅例汤系雪梨粟米无花果煲猪骨汤，虽然等咗一段时间先饮，但汤身入口仍然是暖笠笠，入口清甜温润，养阴润燥，用作抗疫汤水就最适合不过。马来咖喱牛腩饭 ($75)：牛腩份量极多，足足有成 7、8 件，件件都肥瘦适中，而且焖得软腍入味，入口一点也不柴皮，相连的软筋膜亦爽滑不韧。咖喱汁辣味较重，但又未致会盖过牛腩的肉味；薯仔吸收了咖喱汁的味道，用来配白饭吃一流。芝麻黑糖醋骨 ($75)：糖醋骨卖相唔错，面头洒上了少许白芝麻，入口甜甜地又带点黑醋的酸香，而且食落仲保持住炸过的香口，脆得嚟又唔痴牙。白饭粒粒分明，干爽有嚼劲。