一漁外賣壽司 (已結業)

圣诞三日红假，其中一日入左嘉湖亲戚屋企麻雀耍乐，通常一打都会打到食晚饭，个个打到唔愿停，我就帮手落去买𩠌，去到颂富街市见哩间外卖寿司店几多人帮趁，亲戚都话未食过，所以我地就买左一盒返去加𩠌。一渔虽然只系一间外卖寿司小店，但见入面都有四五个人不停手，佢地除左寿司、饭卷同手卷，都有拉面、乌冬同丼饭，而寿司大部份唔洗$10就有一件。等外卖时周围望下，从玻璃窗可以睇倒佢地嘅厨房，感觉都干净企理。而最令我估唔到嘅系，哩类平价寿司铺竟然会用人手握寿司，虽然比起机握会慢啲，但寿司饭就冇咁易散。寿司盛A($280/30件) - 寿司除左散叫都有set，当然会比散叫平少少，但款式就定左嘅。哩款30件嘅寿司set就包左三文鱼、三文鱼腩、吞拿鱼、赤虾、鳗鱼、油甘鱼、北寄贝、帆立贝、左口鱼同八爪鱼。鱼生都几肥美同大片，仲带有光泽，唔差得过连锁寿司店。总结，寿司唔差几抵食，难怪咁多街坊帮趁。