成都老碼頭火鍋 (已結業)

朋友鐘意食辣火鍋，就揀左成都老碼頭火鍋店，店舖位於大角咀頭段，塘尾道油站對面，旺角地鐵站行過去5分鐘左右，唔難找，但店舖超大，裝修富有中國色彩，間隔空間大，幾乎每張枱都好似獨立卡位咁，坐得好舒服。湯底當然務必要試試佢地出名嘅麻辣火鍋，另外揀左豬骨湯底，湯底好濃烈嘅麻辣椒味，麻得幾過癮，朋友都讚湯底得。嚟到當然要試下佢地出名嘅獨有火鍋料啦，先嚟過爽脆牛黃喉（$48）10s 白色嘅牛黃喉輕淥10秒就可以，口感爽脆彈牙，有啲鮮味。老友鬼鬼（墨魚滑）（$58）用油炸鬼包墨魚滑，做法有新鮮感，食落去口感有稔同爽嘅感覺，另外油炸鬼索哂啲湯底令到味道更豐富。極品鵝腸（$88）10s 呢個必試，鵝腸爽脆新鮮，唔係一味肥，好特別好好食，加上佢用個架逐條整齊掛上，有一種霸氣嘅感覺。高原雪花繡球菌（$68）1週年價10蚊加配，呢個菌我之前未見過未食過，幾特別又大塊爽脆，好清甜。A4雪花和牛（$198）賣相靚又大塊，油脂分佈均勻，食落彈牙有牛味。台灣鴨舌（$40）1min 收費唔貴，份量足夠，鴨舌大隻有肉整體滿意，好食又好坐，食物又有特色，一定會有下次。