Loop Kulture

营业中

休息中

Loop Kulture✖️呢度系一间有裸卖嘅Cafe，除咗食物之外，仲有蜡烛、止汗剂、香体膏、润唇膏、香水、香薰及有机护肤品出售。地方空间都够大，枱与枱之间唔会觉得好逼夹。楼高两层，露营车储物盒，户外行山枱櫈都演变成咖啡室座位嘅一部份。星期六下午两点几到场，竟然唔使排队等位。一入门口就有个咁靓嘅环境可以俾你打卡影相喇！店内有两位小鲜肉，其中一位高大啲嘅小鲜肉好有礼貌，只眼识笑㗎。。。几可爱！开心果牛油果奶昔、北非蛋配酸种面包、牛油果无花果配酸种面包都好吸引。但我一个人根本都食唔到两款咁多，所以同小鲜肉沟通完之后，最后决定要「软包焦糖香蕉树头面包」即系法国吐司，配搭一杯清爽嘅凤梨冰茶。虽然呢个法国吐司唔算平，但系打卡真系好靓呀！周边有石榴肉、无花果、蓝莓，仲有啲瓜子同花瓣，真系好有少女心。隔篱枱𠮶两位少女，影相影到个伯爵茶雪糕都溶晒，都仲未影完。法国吐司个蛋香味好重，切开咗都可以睇到入面好绵密。即使唔搭配雪糕或者枫糖浆，只食蛋香味都好好食。钟意食法国吐司嘅人，有兴趣都可以过嚟打卡食好西。