LIFETASTIC (已結業)

话咁快就到三十几度嘅夏天，西瓜系头号wish list 水果，得知西环香港大学站一出有间店有特色西瓜蛋糕食，今晚终于可以食到啦！餐厅气氛轻松舒服，落地大玻璃加上有趣嘅壁画，系一个可以放松心情品尝美食谈天嘅地方。晚餐食set 比单点化算，两个人细食嘅话可以拣要两份头盘加一份主餐，我地好饿就拣咗一份头盘两份主菜。套餐包括餐汤或沙律，头盘拣咗烟三文鱼酿蟹肉配鱼子酱，四小件清新开胃。主菜拣咗厨师推介嘅咸蛋黄美国鸡髀肉本菇意大利面，走健康路线嘅佢有少许咸蛋黄嘅咸香，鸡髀肉爽口，意粉软硬度适中。令一个主菜拣咗意大利肠配水牛芝士意大利手工薄饼，佢仲有牛油果洋葱新鲜蕃茄做馅料，薄饼薄趣有面粉香，鲜蕃茄酱汁加上香滑牛油果，咸香意大利肠，非常好食。食完主菜终于到期待已久嘅蛋糕啦，我怕会卖晒，一早打电话book 咗件西瓜蛋糕。草莓西瓜蛋糕有满满嘅草莓冻加上鲜厚西瓜层，蛋糕松软唔甜，系夏天蛋糕首选，另外芒果热情果蛋糕，酸甜清爽，系另一个好选择！餐饮拣咗鲜打嘅smoothie , 牛油果健康唔甜，香蕉朱古力浓香甜滑。佢正在做会员优惠，食满＄200可以做会员今个月午餐有小食送，佢午餐同下午茶都有啲set几抵食。