Hygge (已結業)

男朋友放工嚟接我，带我去咗荃湾食dinner，今次去咗荃湾广场附近嘅一间西餐小店，食饱仲可以行埋街添！一入到嚟觉得环境都算舒服，见到餐牌上好多菜式都好吸引，我哋决定咗叫龙虾汤、鲜虾沙律、松露杂菌忌廉汁意粉、香煎波士顿龙虾配牛腹肉同埋伯爵茶布甸。先嚟嘅系番茄龙虾汤，味道好香浓，面头嘅多士浸左汤一齐食味道好好，汤头唔会好腥，够热，配上面包几夹！鲜虾沙律，不过不失，虾肉都几大只，有少少酸酸地嘅酱汁都几开胃清新。松露杂菌忌廉汁意粉，卖相一般，但系份量几多，因为啱啱煮好咗就上菜，所以好够热！一嚟到有好香嘅松露味，啲菇都切得几大粒，增加咗口感，唔错！香煎波士顿龙虾配牛腹肉，龙虾望落就大只，但系虾肉就小咗啲。牛腹肉3成熟，几香牛味，亦都唔韧，几唔错！旁边仲有原个蒜头同半个烧番茄。伯爵茶布甸差唔多每一枱都必点，卖相都几靓，仲有少少玫瑰花瓣同糖浆伴碟。但系食落就有啲扣分，因为面头嘅糖浆真系太甜啦！就咁伯爵茶布甸都已经够晒~最后叫咗2杯嘢饮，柠檬蜜桃梳打同蜜糖生姜茶。前者有啲似退烧药味，后者就几好饮，姜味都几香。