老掌櫃東北菜館 (已搬遷) 新店位置

一客口水鸡跟菜饭、一客素三鲜饺子（饀料系白菜仔＋甘笋＋木耳＋冬菇）同两杯酸梅汁，呢两个午餐足够两个女生些牙食。口水鸡比想像大份，唔系鸡皮多过鸡肉，层皮薄薄地够爽，皮下脂肪失踪，有啲鸡件仲有少少软骨。肉够入味，唔鞋口，配埋个麻辣酱汁真系超级好送饭。麻辣酱汁冇冚咗鸡味，佢唔劲辣，会令你个咀有少少麻，越食越想食。鸡件下面喺一堆非常幼身嘅青瓜丝，同鸡肉一齐食真系好夹，如果冇咗呢堆青bb，成碟鸡会失色。食到最尾，开始攞纸巾出嚟抹鼻水，呢个时候饮一啖酸梅汁，成个人即刻爽晒！食到咁上下，个素三鲜饺子先现身。由于碟鸡浓味，显得饺子份外清新，全靠佢中和返味蕾，一浓一淡呢个组合好搭配。饺子皮唔厚，饀料亦丰富，不过钟意阿纯出品多啲。谂起阿妈钟意食鸡，呢度绝不可走鸡，不过现场坐得迫，肥师奶见到会实会扁咀，买外卖返去就 win win。