大叔拉麵

营业中

休息中

上次听讲大叔拉面搞Pochacco限定时已经想去试，点知成个月都冇得闲。终于等到一日中午要去D2Place，的起心肝去试一次可能系茘枝角最有名嘅拉面。中午都几多人，但我算早到，唔驶等位。店内好多公仔，系几得意嘅。叫咗个特浓鸡白慢煮鸡肉面，以拉面店嚟讲上菜算慢，唔知系咪咁影响咗个面玉，一上枱已经偏腍，唔太掂。如果系以面质嚟评断拉面好坏嘅朋友，应该唔驶嚟试。汤：酱油遮晒鸡白味，虽则话「特浓」系客人拣，但师傅都应注意平衡度。汤底酱油有种酸味，我觉得同鸡白味唔多夹，特色系唔系一定好？在下认为见人见智。蛋系一流，溏心度好，好入味，如果有得斋买蛋外卖，我会帮衬！鸡肉一般，嚡，唔觉系慢煮。叉（腩）够味，够焦，够厚，都算唔错。配菜仲有笋，脆，但冇味，唔俾好过俾。大叔拉面出名，好评多，我认为系因为茘枝角一段冇乜竞争，最近嘅对手可能去到兴华街一带。如果真系论拉面，真系平均以下，但佢嘅价位系喺「平均线」，咁计就性价比低咯。为咗佢只蛋，会揾多次非繁忙时间嚟试下冇咁浓嘅汤面，睇下值唔值推介俾人。