夢 (已結業)

难得下午放假，同朋友去食怀石料理。中环区一向多高质餐厅，今日食呢间真系视觉及味蕾享受！由于厨师发板所以每道菜都期待又惊喜。一开始店员叫我哋可以准备手机拍片，因为呢道菜烟熏效果，好值得影低！打开盒子，一团团烟冒出来，入边有个靓靓嘅粉红色泡沫。泡沫系草莓味！泡沫下有白粟米甜甜地，仲有无花果。之后呢一道菜超级靓！真系估唔到可以整到咁，第一次食！暑假夏日沙滩主题，色彩缤纷。有我最钟意食嘅日本蜜瓜、Parma ham、脆云吞同埋紫薯果冻。呢几样嘢食完几开胃！跟住嘅刺身亦都摆到好似艺术品一样。沙滩主题配上贝壳等等装饰。有带子深海池鱼及爱女鱼。跟住到海胆壳做成碗咁，面上装饰有啲花、海胆、西班牙红虾、蛋。食得出多重味道，西班牙红虾鲜美最突出。之后炸物及粟米汤。好似炸云吞咁，但系入边就系蟹肉。脆炸金目鲷，鱼鳞炸到好靓。之后汤清清地几好饮。然后店员拎出一个木盒，神秘木盒入边有巨锋提子、蜜瓜同脆饼奶冻。以美味水果作结。