一心素食 (已結業)

唔系呢头返工，真系好少去牛头角同观塘之间呢个位，今日黎到呢度，系因为行完山想去食阿元来了，点知咁啱无开，已经好攰唔想行，一致同意过黎大大个招牌嘅一心食晚餐。餐厅有啲健康产品卖，最有兴趣系淮山面，不过佢个形态太似公仔面，唔系我食开白色果只。叫左三个晚餐，跟餐价钱一百上下，前菜沙律好酸，生果新鲜，罗宋汤几浓味，汤料有红萝卜同菜，有蕃茄酸味，餐包无咩特别，柚子蜜饮品够味但细杯左少少，可能我地特别口渴。鲜茄芦笋烩稻庭乌冬，蕃茄好多，足料，但有d up味，乌冬亦太淋，芦笋太碎。XO酱炒饭-炒得几干身，个调味几好，有蛋香，份量多。星洲素海鲜炒淮山面，淮山面似炒公仔面的样同口感，有淡淡咖哩味，素海鲜几有趣，份量多，但较多油。甜品有千层蛋糕同芝士蛋糕，都好有水准，芝士蛋糕香浓，但硬左少少，难切开。环境似快餐店，但呢度员工好好笑容，好有礼貌，我成日出街食饭，但好少餐厅有呢种咁亲切感觉，令人难忘。