Pho 778 (已結業)

湾仔嘅越南餐厅有好几间，但要数最亲民最贴地嘅一定拣Pho 778，帮衬咗几次，食物水准keep到之余，价钱又唔贵，啲员工仲好nice! 生牛肉河：佢嘅安格斯牛肉好新鲜，肉味好浓，而且带有药材味嘅牛骨汤上台嘅时候热辣辣，河粉亦都要赞，好滑唔会「碎湿湿」，唯一要挑剔嘅就系份量小咗啲，叫正常份量唔够饱！香茅猪扒捞檬：水准之作，猪扒即叫即炸，上台嘅时候仲系热辣辣嘅，而檬粉个汁简直就系神级之作，听店员讲捞檬汁系店家自己做调较嘅，酸酸微辣，好惹味！小食：试咗虾饼同网丝春卷，春卷真系好脆好香口，配埋个汁真系好好食！可能系春卷真系太好食嘅缘故，显得虾饼有点平凡，不过都几好食！饮品：薏米水，几好饮，清甜又解渴，连同行嘅小朋友都抢住饮！题外话，女店员真系好贴心，我地食完无即刻离开而选择坐多阵倾计，佢帮我地收晒啲碗碟等我地可以慢慢坐，服务一流，抵赞！