園林閣咖啡室

营业中

休息中

见食评好坏参半，最好梗系亲身嚟试下。由于订得比较迟，安排坐嘅位置比较后。不过唔紧要，最梗要有得食。首先黎个沙律，选择唔算多，但啲蔬菜都好新鲜。蟹脚啲肉质唔咸，可口。虽然生蚝唔系即开，但肉质厚身味甜，蚝有蚝味！(如果你试过食即开生蚝，肉细又冇味，你就唔会坚持即开一定好) 蚬冇沙，啖啖肉，冷虾够弹性，唔错！到咗厨房区，师父不停喺度炸天妇罗，由于人流够，炸物够香口，特别好食！(怕热气另计)天妇罗款式都算多，因为我第二轮行返去嘅时候，已经见转咗第二轮食物。串烧有鸡肉、牛肉、鱼片等，大路款式。但肉味适中。片皮鸭师傅不停喺度切，成晚见佢好似切咗六、七只鸭。热盘都有几多选择，有烩牛尾、烩鱼柳、时菜珊瑚蚌、青口、时菜花姿片同中式蒸鱼，都几老少咸宜。到咗甜品区，件件都系一口甜品，可以一次过试多几款。雪糕汽水当然唔少得，实行黎过大放纵。因为有买一送一优惠只系需要280蚊，呢个价钱，如果你要求一个优雅宁静嘅环境，我谂真系谂多咗。佢哋自助晚餐真系好热闹，但我见啲客人都好斯文，大家都好守规矩排队冇打尖 (如果你食自助餐见过抢食情况你就会明) ，而啲员工都好有礼貌，不停喺度收碟同加食物，所以我个人觉得收货！