CoCo壹番屋 (已結業)

呢间座落于APM边皮死角位置嘅「CoCo壹番屋」，小弟经常路过，但系都由于晚饭时间排队现象过激嘅关系，令小弟每次都望门轻叹，过门不入。难得终于见到冇人排队，即时拖埋女友入去试吓到底一间只系卖咖哩饭嘅舖头点解咁把炮周时排长龙。今次点咗餐牌上嘅「吉列猪扒庵列咖哩饭」跟餐，同埋单点「牛肉庵列咖哩饭」。是日例汤系呢个鲣鱼海带煲洋葱萝卜，饮落腥腥鲜鲜，但系好清甜，有啲似日式拉面之中嘅东京酱油汤底。冻奶茶中伏，系冰奶茶甜四种味道完全分开嘅味道。「吉列猪扒庵列咖哩饭」－鸡蛋冇乜蛋味，饭粒食得出用嘅系靓米，咖哩汁香得嚟唔太辣，最重点系个吉列猪扒，有猪肉味而冇猪肉嘅禽畜味，表层松脆，粉浆较得厚薄得宜，猪肉冇筋，只可惜冇乜肉汁。「牛肉庵列咖哩饭」－牛肉粒嘅份量小器咗啲，牛味浓之同时亦有一种类似牛尾嘅臊味。特登试埋佢个雪糕，味道太普通，曲奇唔脆，建议各位可以响跟餐时不纳入点选范围。呢兜红色嘅物体似乎系泡萝卜，口感几得意、酸酸甜甜几消滞。食饱饱抹干净个嘴仔走人。