榕易燒泰式串燒專門店 (已結業)

望穿秋水，终于等到晚市重光😂，值得纪念嘅第一餐，梗系要食最钟意嘅嘢，我就拣咗食串烧。呢间店全部都系露天座位，感觉好 chill，有啲似去咗 BBQ 场烧嘢食。众多烧烤食物当中，我最钟意烧原条蒜蓉茄子，茄子算肥美，调味都几重手，蒜蓉味劲浓，好好食😍，不过食完个口好臭，戴返口罩时就自己受哂🤣。另外烧豆卜都好正，又香又脆；日式一口牛都唔错，肉质有肥有瘦有咬口，亦有牛味；其余蜜糖鸡中翼，鸡皮串，两款台湾肠等等就正常水准，至于烧羊架唔系我食，无可奉告😁。最弱系烧粟米，唔单止唔甜，仲好硬，唔好食😖。由于系泰式串烧，店员会奉上点猪颈肉嘅酱汁，酸酸辣辣，好惹味😋。除咗烧烤食物，呢度仲有好多泰式食品提供，我哋叫咗椒盐鱿鱼须同泰式炒椰菜苗，鱿鱼须外层香脆惹味，入面肉质软腍，有鱿鱼鲜味，𩠌酒一流（事实上，成个场大部份食客都系啤酒接啤酒咁队，得我哋咁正气饮乌龙茶桔仔冰😆），椰菜苗比较少机会食，一个个圆碌碌好得意，炒得亦好香，不过质感偏硬，唔系我钟意嘅口味。本来仲叫咗蚝饼，不过漏咗单，唔紧要，因为食到呢度都已经饱哂，埋单时，发现原来唔使加一，所以算几抵食，会再嚟帮衬。