磯の水產

营业中

休息中

观塘海滨行到傍晚有啲饿，比对面马路一间挂满灯笼嘅餐厅吸引咗，入到去发现系间日式居酒屋，橙红灯光下充斥住好香嘅烧物味。寿司拼盘（七件）由厨师精选，每日都会供应唔同嘅时令海鲜，今次就有带子、三文鱼腩、油甘鱼、拖罗、鱼子、池鱼、炙烧左口鱼。上枱见到真系冇得输，刺身每件厚身饱满、色泽明亮鲜艳、食落十分鲜甜。有啲鱼味浓郁扎实、有啲软滑细腻、有啲油脂感满，各有出色之处。蟹肉牛油果沙律面头满满嘅蟹肉，用上唔同款式嘅沙律菜垫底，加入牛油果同埋沙律酱，天衣无缝嘅配搭。口味清新怡人，材料简单但好食，份量仲一啲都唔少。烧猪腩肉串串烧火候拿捏得刚好，肉唔会太干，但系又有焦香感，猪味浓，亦几有咬口。重点系面头嘅调味食得出唔会好单一，唔系死咸，淡得来几有层次，提升到肉味。烧蚝面头嘅酱汁好多好浓郁，够晒creamy。原本嘅蚝亦相当出色，好大只，入口爆汁，鲜味十足，相当邪恶又滋味，推荐。呢到嘅烧物果然出色，下次一定会再试多几款！鳗鱼炒饭看似一小盘，但3人食都够，值得一赞系主角鳗鱼份量好足。不论望落去定系实际食，每口都满布鳗鱼粒嘅足迹。炒饭配料虽简单，有萝卜粒、紫菜、葱蒜等，但配上有嚼头嘅米粒，食得好满足。