CHiLL-i (已結業)

🍽🍽最近钟意响观塘工厦试吓唔同嘅小店，今晚上咗去骆驼漆工业大厦，揾到呢间隐世高质餐厅。餐厅装修简约时尚，地方唔算太大，但坐得舒服，好适合几个朋友食饭倾吓偈。餐牌选择都好多，入面嘅菜式都几特别，唔系一般西餐厅𠮶啲例牌野。🥑🥑拣咗前菜「焗意大利杂菜玉米片配牛油果酱」，卖相靓之余，杂菜落咗少少辣椒，配上脆卜卜嘅玉米片同牛油果酱，十分开胃醒神。🦐🦐主菜分别要咗「胡椒焗三文鱼伴面豉浸萝卜煎玉米饼」同「麻辣海龙王海鲜意大利饭」。先要赞一赞佢嘅摆盘，真系好有心思，完全系酒店级嘅质素。冇谂过观塘工厦会有咁有诚意，咁高质嘅西餐厅。🌽🌽焗三文鱼整得好味之余，配搭萝卜同埋玉米饼，好有特色，味道亦相当夹。另外要赞吓麻辣海鲜意大利饭，劲多海鲜配料，味道好有层次感，淡淡麻辣味道，但唔会太辣。仲好特别咁用咗银鱼仔炸成脆片，好有心思。🍹🍹饮品方面，叫咗杯招牌特饮「热情仲夏」，入面有热情果，菠萝，红茶同埋梳打。钟意佢唔会太甜，感觉好清新。另外叫咗杯「Chill-I x Answer 港式冻奶茶」，茶味好香浓，奶好滑，绝对系我钟意嘅港式奶茶味道。冇谂过食西餐都可以饮到杯咁正嘅港式奶茶，真系有惊喜😋😋