泰芒了 (已結業)

经过观塘广场地下，见到间新开张嘅饮品店 叫做泰芒了。顾名思义，佢哋就专卖泰国芒果饮品嘅店舖。我哋见到啲芒果饮品好似几大杯几吸引㖞，就一于试下，睇下佢同佢留山啲饮品有咩分别啦。叫咗杯泰芒了，佢有大杯装同细杯装拣，而大杯装个size大过个细杯装咁多，都系加9蚊，我哋紧系叫大杯装喇。饮品出到嚟其实有啲失望，因为个卖相同个模型都有啲差距。 杯泰芒了分咗几层，第一层就系有芒果肉同埋啲芒果绵绵冰，而第二层就系啲忌廉加埋有柚子肉。最后一层系啲芒果汁。其实之前都喺泰国食𠮶啲泰国芒果都知其实唔会话好甜而略带酸味。呢杯正正符合我哋预期。芒果肉有少少酸唔系好甜，当然啦各人有各人嘅喜好啦，我就较钟意食好甜𠮶啲芒果多啲。芒果食落唔似新鲜切出嚟 感觉上就色泽偏黄，可能系一早切定放系度。而绵绵冰呢真系唔够绵呀，食落似系沙冰多啲，会食到一粒粒嘅冰，有点失望。 中间个层忌廉，其实真系唔系好需要，除咗甜之外根本就唔会食落肚，同埋又加咗啲柚子肉落去，但系我一啲都食唔出。好彩成分最多嘅芒果汁呢，系几好味几新鲜嘅，甜度刚好，唔会令到我哋失望。总括嚟讲饮品有待改善。